Herzlichen Dank für den Schmerkner Kulturpreis 2026
Die Bibliothek Schmerikon wurde für den Dorf Champion in der Kategorie Kultur nominiert. Und siehe da: Am Chilbisamtag durfte die Bibliothek Schmerikon den 1. Schmerkner Kulturpreis entgegennehmen.
Wow! Mir sind überwältigt! En neue Pris wird is Läbe grüeft und mir händ d’Ehr zum de übercho!
Es herzlichs DANKESCHÖN am Komitee wo eus usgwählt hät und a dere Person, wo üs nominiert hät.
Viele Dank a alli, wo üs understützed - seg das di politisch Gmeind, d’Ortsgmeind, Betrieb us em Dorf oder anderi Spender.
Herzliche Dank allne Benutzende vo de Bibliothek Schmerkä, wo üs immer wieder zeiget, dass es nöd nume e veruckti Idee gsi isch zum i üsem Dorf vor vierehalb Jahr e Bibliothek uf d’Bei zstelle, sondern dass es es Bedürfnis isch, en Ort zha, wo me cha Büecher und anderi Medie uslehne, wo me sich chan treffe, en Alass oder en Kurs bsueche.
Ganz en bsundere Dank au a alli wo mit ihrem Isatz d’Bibliothek no lebendiger mached – seg das mit ihrem Agebot vom EnglishChatroom, de Konversationskürs, em Lismi- oder Spilinamitag und au a alli wo bi üs chömed cho Gschichte verzelle, wo Chüeche bached oder i ihrer Freiziit Sitzbänkli schriinered.
Denn no e ganz en riesige Dank as Bibliotheksteam – ihr alli mached die Arbeit ehreamtlich – seg das i de Usleih, im Ichauf und bim Ettiketiere, bim Butze, bim Bricht- und Protokollschriebe, bim Flyer gstalte, bim Chuechebache, bim Illustriere vo de PlapperplauschMinibook, bim Aläss organisiere oder eifach bim Mitdenke a de Sitzige – OHNI EU GIENGT DAS ALLES NÖD!
Viele Dank für eui tolli und unermüedlichi Arbet!
Von: Andrea Cortese, Verein Bibliothek Schmerikon
